+374 94 000 446

Նավթավերամշակման գործարանի շինարարությունը կասեցնելու մասին որոշում Է կայացվել

Դիտվել է` 2675

20.07.2018
post single img

Սույն թվականի հուլիսի 10-ին Բնապահպանության և ընդերքի տեսչական մարմնի կողմից «Արմօյլ» ՓԲԸ նկատմամբ հարուցված վարչական վարույթի շրջանակում պարզվել էր, որ Կոտայքի մարզի Եղվարդ քաղաքի Նատի թաղամասում նավթավերամշակման գործարանի շինարարությունը սկսելուց առաջ «Արմօյլ» ՓԲԸ չի իրականացրել «Շրջակա միջավայրի վրա ազդեցության գնահատման և փորձաքննության մասին» ՀՀ օրենքով նախատեսված հիմնադրութային փաստաթղթերի հիման վրա գործարանի հետագա կառուցմամբ շրջակա միջավայրի վրա ազդեցության գնահատում և փորձաքննություն։    

Ելնելով վերոգրյալից՝ Բնապահպանության և ընդերքի տեսչական մարմնի ղեկավար Արթուր Գրիգորյանը հուլիսի 16-ին կայացրել է նավթավերամշակման գործարանի շինարարությունը կասեցնելու մասին որոշում մինչև «Շրջակա միջավայրի վրա ազդեցության գնահատման և փորձաքննության մասին» ՀՀ օրենքով նախատեսված հիմնադրութային փաստաթղթերի շրջակա միջավայրի վրա ազդեցության գնահատումը և փորձաքննության դրական որոշման ստացումը։

Նշենք, որ դեռ 2016 թ. մարտին ԱրմԻնֆո-ի հետ հարցազրույցում ԱրմՕյլ-ի գլխավոր տնօրեն Ալֆրեդ Աբեդին նշել էր, որ ընկերության հիմնական նպատակը նավթամթերքի արտադրությունն է՝ «Պատրաստված է Հայաստանում» ապրանքանիշով:

Ներդրումային փաթեթը նախապես պետք է իրականացվեր երեք փուլով, ներդրումների ընդհանուր ծավալը`35 մլն դոլար: Նախագծի առաջին փուլը նախատեսվում է Եղվարդում նավթավերամշակման գործարան կառուցել, որը հագեցած կլինի գերմանական, իտալական և իրանական տեխնիկայով: Ըստ բիզնես-պլանի, առաջին փուլում արտադրության ծավալը կկազմի տարեկան 15 հազար տոննա շարժիչային յուղ և 6 հազար տոննա գուդրոն: Հետագայում գործարանը հնարավորություն կունենա վերամշակել արդեն օգտագործված շարժիչային յուղը և այն օգտագործել որպես հումք, ինչն առաջին հերթին կօգնի պահպանել շրջակա միջավայրի մաքրությունը: Գործարանը կունենա յուրահատուկ մասնագիտացված լաբորատորիա տարածաշրջանում, որը հագեցած կլինի ժամանակակից սարքավորումներով: Ընկերությունը միայն ներքին շուկայում վաճառելու համար նախատեսում է արտադրել 100 միլիոն դրամի ապրանք: Գործարանը, որի տարածքը կազմում է 5 հազար քառակուսի մետր, հետագայում մինչև 15 հազար քառակուսի մետր ընդլայնման հնարավորությամբ, կունենա նաև ստորգետնյա և վերգետնյա բազաներ, որոնք անհրաժեշտ են 4 հազար տոննա դիզվառելիքի, 2 տոննա բիտումի և 2-3 հազար տոննա հումք պահեստավորման համար, տարբեր տեսակի յուղերի արտադրության, ինչպես նաև 20 հազար տոննա պատրաստի արտադրանքի համար: Տեղում կառուցվում են գրասենյակային տարածքներ, իսկ մնացած մասը կազմում են անգարները, լաբորատորիաները: Ծրագրի առաջին փուլի իրագործման համար նախատեսվում է ներդրնել  մոտ 15 մլն դոլար: Ծրագիրը նախատեսվում է ավարտել երեք տարվա ընթացքում:

Մինչդեռ, 2017 թ. հոկտեմբերի 18-ին տեսչական մարմինը գործարանի շինարարությունը դադարեցնելու որոշում էր կայացրել: Ընկերությունը գործարանը կառուցել է՝ առանց բնապահպանական փորձաքննության անցկացման: Այդ ժամանակ ևս ընկերությանը պարտավորեցրել էին

գործարանի կառուցման համար շրջակա միջավայրի վրա ազդեցության ռազմավարական գնահատում և փորձաքննություն անցկացնել: Այնուամենայնիվ, ընթացիկ տարվա մարտի 22-ին  ԱրմԻնֆո-ի թղթակցի հետ զրույցում ընկերության գլխավոր տնօրենը հայտարարել էր, որ երկու կամ երեք ամսից Եղվարդ քաղաքում նավթի վերամշակման գործարանը կդառնա իրականություն: «Նախնական բիզնես պլանի համաձայն, գործարանի տարածքն ավելացել է, ինչպես նաև արտադրական ծավալները»,- հայտարարել էր նա:

Ծառայություններ

Վերջին դիտումները