ՀՀ գյուղատնտեսության նախարարության նախաձեռնած օրենսդրական փոփոխությամբ հավասար մրցակցային պայմաններ են ստեղծվում Հայաստանում կոնյակի սպիրտ արտադրողների և ներմուծողների միջև: 

«ԱԺ-ում հանդես եկանք համապատասխան օրենսդրական փոփոխության նախաձեռնությամբ, և այն ընդունվեց: Փոփոխությունը միտված է հասնելու խաղողագործության, կոնյակագործության զարգացմանը և տեղական արտադրողի պաշտպանությանը: Սպիրտի և կոնյակի արտադրությունները ծանուցման ենթակա գործունեություններ են, տուրքը 15 մլն դրամ է: Մինչդեռ ներկրումը ծանուցման ենթակա գործունեություն չէ: Այսինքն՝ սպիրտ ներկրողն ավելի բարվոք վիճակում էր գտնվում, քան տեղական արտադրողը: Հիմա մենք տեղական արտադրողին և ներկրողին բերեցինք նույն օրենսդրական հարթություն, սպիրտ ներկրելը ևս դարձավ ծանուցման ենթակա գործունեություն»,- ասաց նախարարը:

Նրա խոսքով՝ գինեգործների միության ղեկավարը ևս լավ գնահատական է տվել այդ փոփոխությանը՝ ասելով, որ վերջապես առկա է վատ որակի սպիրտի ներմուծումը կանխելու հնարավորություն:

Ըստ Արթուր Խաչատրյանի՝ փոփոխություն է կատարվել նաև մեծ և փոքր ընկերությունների մեջ հավասարություն սահմանելու նպատակով: 100 000 լիտրից ավելի սպիրտի արտադրության դեպքում հավելյալ յուրաքանչյուր լիտրի համար լրացուցիչ գումար է վճարելու արտադրողը:

Նյութի աղբյուրը՝ Armenpress.am