ՀՀ կենտրոնական բանկը կառավարության հետ քննարկում է հիփոթեքային վարկի մարման տոկոսադրույքների սուբսիդավորումը մարզերում երեխաներ ունեցողների համար ավելացնելու հնարավորությունը: Այս մասին Ազգային ժողովում ասաց ԿԲ նախագահ Արթուր Ջավադյանը` պատասխանելով «Լուսավոր Հայաստան» խմբակցության պատգամավոր Մանե Թանդիլյանի հարցին, թե արդյոք դիտարկում են նոր հիփոթեքային ծրագրեր:

«Դիտարկվում են մի քանի հիփոթեքային նոր ծրագրեր, ու մի քանի փոփոխություն այս պահին  շրջանառության մեջ է կառավարությունում: Վերջերս քննարկում եղավ, որ մարզում երեխաներ ունեցողների սուբսիդավորումը ավելացնենք: Հարցը քննարկման ներքո է, դա վերաբերելու է թե ազգային հիփոթեքային ընկերության միջոցով տրամադրվող վարկերին, թե «Մատչելի բնակարան` երիտասարդ մասնագետներին» և այլ ծրագրերին»,-ասաց Ջավադյանը:

Նա տեղեկացրեց, որ առաջարկում են սուբսիդավորումն ավելացնել կես տոկոսից մեկ տոկոսով: ԿԲ նախագահը նշեց, որ դա դիտարկում են որպես սոցիալական ծրագիր, որ շատ երեխա ունեցողներին պետությունն ավելի շատ սուբսիդավորի: Կախված երեխաների քանակից՝ մարդիկ հնարավորություն կունենան ավելի քիչ վճարել:

Նյութի աղբյուրը՝ Armenpress