ՀՀ կառավարությունը նպատակադրվել է ապահովել տարեկան միջինը 5% տնտեսական աճը, ինչն էլ ամրագրված է վերջինիս գործունեության հնգամյա ծրագրում: Այդ մասին փետրվարի 8-ին կառավարության նիստից հետո հայտարարել է տնտեսական զարգացման և ներդրումների նախարար Տիգրան Խաչատրյանը:

Նախարարի խոսքով, անցած տարվա հաշվետվությունները վկայում են, որ աշխարհում տնտեսական աճի միջին ցուցանիշը կազմում է 3,7%: «Մենք ցանկանում ենք ապահովել այնպիսի պայմաններ, որ աճը զգալիորեն բարձր լինի: Բայց դրա համար անհրաժեշտ են ներդրումներ: Եթե նշված ժամանակահատվածում /հինգ տարի/ կառավարությանը հաջողվի կայունացնել ներդրումները՝ հիմնական միջոցներով ներդրումները համախառն ներքին արդյունքի նկատմամբ 23-25 տոկոս միջակայքում, վստահ եղեք, որ դրան հաջորդող ժամանակահատվածում խոսելու ենք ավելի բարձր աճի տեմպերի մասին»,- ասել է Խաչատրյանը:

Միաժամանակ, ինչպես նշել է տնտեսական զարգացման և ներդրումների նախարարը, այս անցումային շրջանում, երբ տնտեսությունը կառուցվածքային փոփոխություններ է կրում, ի հայտ են գալիս արդյունաբերության նոր ճյուղեր, որոնք մեծ դեր կխաղան երկրի տնտեսական կյանքում, նոր շուկաների յուրացման հաշվին, 5%-ը բավական հավակնոտ ցուցանշ է: Ինչպես նշել է գերատեսչության ղեկավարը, ՀՆԱ 5% աճը միջին ցուցանիշ է հնգամյա ժամանակահատվածի համար. մի տարի աճը կարող է կազմել 4,5%, մյուս տարի՝ 6%: ՀՀ պետբյուջեի համաձայն՝ ՀՆԱ աճը 2018 թվականին նախատեսված էր 4,5%: 2019 թվականին սպասվում է 4,9% աճ, իսկ ինֆլյացիան՝  2,7%: