Հայաստանի տնտեսական ակտիվության ցուցանիշը 2019 թվականին կազմել է 7.8%: Սա ամենաբարձրն է այս ցուցանիշի հաշվարկման ողջ ընթացքում՝ սկսած 2011 թվականից:

Այս մասին հայտնեց ՀՀ էկոնոմիկայի նախարար Տիգրան Խաչատրյանն՝ անդրադառնալով նախորդ տարվա արդյունքներին:

Ըստ Խաչատրյանի, այս աճը պայմանավորված է զգալի չափով արտահանման հետ, քանի որ կոնյակի արտահանումը այս տարի գերազանցել է 26 % - ը, տպավորիչ է նաև գինիների արտահանման աճի ցուցանիշը, որից մրգային գինիների աճը կազմել է 75 %, իսկ 26 % - ով աճել են խաղողի գինիները։ Զարգացող նոր ուղղություններից է  շոկոլադը, որի աճը կազմում է 14.2 %։

«Շինարարությունն է աճել աննախադեպ տեմպերով՝ 4.6 %, ծառայությունները գրանցել են 15%-ի աճ։ Ամբողջ տարվա ընթացքում ունեցել ենք զբոսաշրջության դինամիկ աճ. եթե 9 ամսվա տվյալներով զբոսաշրջությունն աճել էր 14,4%-ով, ապա տարեկան նախնական տվյալները հուշում են, որը աճը կկազմի 15%: Նաև նկատում ենք, որ էական աճ կա հանրային սննդի և գիշերակացի ծառայություններում՝ 27%, ինչը նշանակում է, որ ներգնա զբոսաշրջությունը լավ պայմաններ է ստեղծել փոքր ու միջին բիզնեսի համար»,- նշեց նախարարը՝ հավելելով, որ դեռևս չի ամփոփվել տարեկան համախառն ներքին արդյունքի աճը, սակայն, իրենց գնահատականներով, այն կգերազանցի նաև մեր վերջին կանխատեսումները, այսինքն տնտեսական աճը 2019 թվականին կլինի 8%-ի սահմաններում։

Նախարարը նշեց, որ դեռևս ձեռնպահ կմնա կանխատեսումներից՝ ընթացիկ տարվա համար, փոխարենը վերահաստատեց, որ կառավարությունը հանձնառու է իր տնտեսական քաղաքականության շրջանակում անել առավելագույնը, որպեսզի 2020 թվականին ևս արձանագրեն նախորդ տարվա դրական արդյունքին համահունչ արդյունքներ՝ շարունակելով ապահովել կանխատեսելի, կայուն և հավասար միջավայր տնտեսական կյանքի բոլոր մասնակիցների համար։ Եվ այն խնդիրները, որ նախորդ տարի նկատել ու հավաքագրել, սակայն չեն հասցրել լուծել ամբողջությամբ, այս տարի փորձելու են պահել իրենց ուշադրության կենտրոնում և յուրաքանչյուրի համար հետևողականորեն գտնել համապատասխան լուծումներ։