ՀՀ Ազգային ժողովը մայիսի 7-ի նիստում ավարտել է «Լուսավոր Հայաստան» խմբակցության առաջարկած՝ «Սպառողական կրեդիտավորման մասին» օրենքում փոփոխությունների նախագծի քննարկումը:

ԱԺ պատգամավոր Մանե Թանդիլյանի խոսքով ՝ ներկայումս գործող օրենքն ընդունվել է 2008 թվականին եւ անցած 11 տարիների ընթացքում շուկայում լուրջ փոփոխություններ են տեղի ունեցել, առաջին հերթին՝ կապված են գնաճային գործընթացների հետ, որոնք միջին հաշվով կազմել են տարեկան 5 տոկոս ։  Եվ եթե 2008 թվականին կարելի էր ավտոմեքենայի ձեռքբերման համար ներգրավել 30 հազար դոլարի սպառողական վարկ, ապա այսօր այդ նպատակով կպահանջվի 40-45 հազար դոլար: Այդ առնչությամբ առաջարկվում է փոփոխություն կատարել «Սպառողական կրեդիտավորման մասին» օրենքում, որի համաձայն առաջարկվում է ամբողջությամբ հրաժարվել սպառողական վարկի 100 հազար դրամ ստորին սահմանից, իսկ վերին սահմանը ներկայիս 10 մլն դրամից բարձրացնել մինչեւ 15 մլն դրամ:

ՀՀ Կենտրոնական բանկի նախագահի տեղակալ Ներսես Երիցյանն իր հերթին նշել է, որ սկզբունքորեն դեմ չլինելով ներկայացված փաստաթղթին՝ ԿԲ-ն միեւնույն ժամանակ գտնում է, որ 10 մլն դրամ եւ ավելի գումարը չի կարող սպառողական վարկ համարվել: Ինչ վերաբերում է ստորին սահմանին, ապա, ինչպես նշել է Ներսես Երիցյանը, երկրի կառավարությունը նախաձեռնել է իր օրենքի նախագիծը, որն ուղղված է գյուղատնտեսության եւ փոքր ձեռնարկատիրության վարկավորմանը, որի համաձայն առաջարկվում է նաեւ հանել սպառողական վարկի ստորին սահմանաչափի մասին դրույթը:

Նրա խոսքով, Եվրոպական միության դիրեկտիվի համաձայն, սպառողական վարկի չափը պետք է համատեղելի լինի բնակչության մեկ շնչին ընկնող եկամտի հաշվարկի հետ։ Սպառողական վարկը չի կարող կրկնակի գերազանցել միջին եկամտի չափը: Հայաստանում այդ ցուցանիշը մի քանի անգամ ավելի բարձր է։  Մինչդեռ օրենքը պետք է ուղղված լինի բնակչության խոցելի խավերի պաշտպանությանը։

ԿԲ փոխնախագահն ընդգծել է, որ սպառողական վարկերի տեսակարար կշիռը բանկային համակարգի և վարկային կազմակերպությունների ընդհանուր պորտֆելում կազմում է շուրջ 10 տոկոս: Ընդ որում, արդյունաբերությունում այն հավասար է 17% - ի, գյուղատնտեսությունում և վերամշակման ոլորտում՝ նույնպես 17% - ի։   Ընդհանուր առմամբ, ինչպես հավաստիացրել է Ներսես Երիցյանը, երկրի բանկային համակարգի տոկոսադրույքներն այսօր չեն գերազանցում 24 տոկոսը:

Ներկայացված փաստաթղթի քվեարկությունն առաջին ընթերցմամբ տեղի կունենա այսօր։

Նյութի աղբյուրը՝ Arminfo