Հայաստանն ու Հունաստանը մտադիր են քայլեր ձեռնարկել տնտեսական կապերն ակտիվացնելու ուղղությամբ եւ կոնկրետ առաջարկներ ներկայացնել միմյանց: Այդ մասին պայմանավորվածություն է ձեռք բերվել տնտեսական զարգացման և ներդրումների նախարարի տեղակալ Մանե Ադամյանի և Հունաստանի ԱԳՆ միջազգային տնտեսական համագործակցության և զարգացման հարցերով գլխավոր քարտուղար Իոաննիս Բրախոսի գլխավորած պատվիրակության հանդիպման ընթացքում։

Ինչպես հաղորդում են նախարարության մամուլի ծառայությունից, հանդիպման ընթացքում քննարկվել են հայ-հունական հարաբերություններին առնչվող մի շարք հարցեր։ Երկուստեք կարևորվել է երկրների միջև տնտեսական համագործակցության ակտիվացումն ու առևտրաշրջանառության ծավալների ավելացումը, ինչի համար առկա է մեծ ներուժ: Այս համատեքստում ընդգծվել է հայ-հունական միջկառավարական հանձնաժողովի ակտիվ գործունեության անհրաժեշտությունը և առաջարկվել է հերթական նիստն անցակցնել Երևանում։

Կողմերը նշել են, որ հայ-հունական հարաբերությունները զարգանում են երկու ժողովուրդների հնագույն ժամանակներից եկող բարեկամության ամուր հիմքի վրա, որն էլ ավելի կամրապնդվի երկկողմ փոխայցելությունների շնորհիվ: Կողմերը հեռանկարային են համարել փոխգործակցության ընդլայնումը տնտեսության մի շարք ոլորտներում:

Նախարարի տեղակալ Մանե Ադամյանը ներկայացրել է Հայաստանի՝ որպես կապող կամրջի հնարավորությունները՝ ԵՄ-ԵԱՏՄ-ԻԻՀ-Մերձավոր Արևելք տնտեսական հարաբերությունները կազմակերպելիս, ինչպես նաև Հայաստանի ազատ տնտեսական գոտիների պայմանները։

ՀՀ վիճակագրական կոմիտեի տվյալներով, Հայաստանի եւ Հունաստանի միջեւ առեւտրաշրջանառությունը 2018 թվականին աճել է 32 տոկոսով՝ մինչեւ 64.8 մլն դոլար: Ընդ որում, արտահանումն աճել է 40.3 տոկոսով՝ մինչեւ 271.5 հազար դոլար` ներմուծման 32 տոկոսով, մինչեւ 64.6 մլն դոլար աճի պայմաններում:

Նյութի աղբյուրը՝ ARMINFO