Հայաստանից Չինաստան և հակառակ ուղղությամբ կատարել բեռնափոխադրում առանց որևէ լոգիստիկ խնդրի. այս նպատակով երկու երկրները կոնկրետ քայլեր են ձեռնարկում: Այս հարցի քննարկումը եղել է ՀՀ վարչապետ Նիկոլ Փաշինյանի գլխավորած պատվիրակության՝ Չինաստան կատարած այցի օրակարգում: Այս մասին նշեց ՀՀ բարձր տեխնոլոգիական արդյունաբերության նախարար Հակոբ Արշակյանը, ով այդ ժամանակ պատվիրակության կազմում էր որպես ՀՀ տրանսպորտի, կապի և տեղեկատվական տեխնոլոգիաների նախարար:

«Այցի ընթացքում քննարկել ենք այն, որ Հայաստանն ու Չինաստանն ունենան տրանսպորտային համաձայնագիր, ըստ որի, հայկական բեռնափոխադրողները հանգիստ կկարողանան ուղևորվել Չինաստան, և չինական բեռնափոխադրողները ՝ Հայաստան: Այդպիսի համաձայնագիր մենք Չինաստանի հետ չունենք, և, ըստ էության, որոշակի բարդություններ են առաջանում, լոգիստիկ խնդիրներ են լինում: Կա հստակ պայմանավորվածություն, որ գնում ենք համաձայնագիր կնքելու ճանապարհով: Համաձայնագրի սևագիր տարբերակը պատրաստ է, և մենք ԱԳՆ-ի միջոցով չինական կողմի հետ շփվում ենք, որ այն համաձայնեցնենք ու ստորագրենք»,-ասաց Հակոբ Արշակյանը՝ ավելացնելով, որ այցի շրջանակում տեղի ունեցավ հանդիպում չինական երկու խոշոր ընկերությունների հետ, մասնավորապես, C.C.C.C-ն (China Communications construction company) և «China railway» ընկերությունը:

Վարչապետի գլխավորած պատվիրակության այցելության ընթացքում մի շարք կարևոր հանդիպումներից Հակոբ Արշակյանն առանձնացրեց Չինաստանի Տրանսպորտի նախարարի հետ հանդիպումը,  որի շրջանակում քննարկվել է Հայաստանի «Հյուսիս-Հարավ» ծրագիրը՝ որպես չինական «Մեկ գոտի մեկ ճանապարհ» նախագծի մի մաս դիտարկելու հարցը:

«Քննարկվում էր այն հարցը, որ մեր ծրագիրը դիտարկվի ոչ միայն Հայաստանի հյուսիսն ու հարավը միացնող, այլ՝ որպես Պարսից ծոցի և Սև ծովի ավազանի երկրները միացնող մի նախագիծ: Այդտեղ լրջագույն քննարկումներ են տեղի ունեցել, և չինական կողմը պատրաստակամություն է հայտնել «Հյուսիս-Հարավ»-ը «Մեկ գոտի մեկ ճանապարհ» նախագծի մաս դիտարկելու, ըստ այդմ, համագործակցության ծրագրեր իրականացնելու հայկական կողմի հետ»,-ասաց նա:

Ինչ վերաբերում է տեխնոլոգիական ոլորտին, ապա Չինաստանի կապի և ինդուստրիայի նախարարի հետ հանդիպման ընթացքում խոսվել է կապի և տեխնոլոգիական համագործակցության ուղղությունների մասին: Հակոբ Արշակյանը նշեց, որ «Մեկ գոտի մեկ ճանապարհ» մեծ նախագիծն իր մեջ ներառում է ասիական երկրներն աշխարհի մյուս երկրներին միացնող ինֆորմացիոն գերմայրուղու ծրագիր, որը մի քանի մասից է բաղկացած: Մի մասը գործում է Ռուսաստանի տարածքով, որն իրենից ենթադրում է թվային կապուղիների հսկայական ենթակառուցվածք և միանում է Եվրոպային:

«Մյուս մասը նախատեսված է Աֆղանստանով, Իրանով: Հիմա քննարկվում  է շարունակությունը, պետք է որոշեն՝ այդ գերմայրուղին անցնի Թուրքիայով, Ադրբեջանով, թե Հայաստանով: Ես նախարարին ներկայացրեցի մեր հնարավորությունները: Մասնավորապես, այն, որ մենք արդեն ունենք օպտիկամալուխային ենթակառուցվածք, որն անցնում է Հայաստանով, Իրանով գնում է դեպի ծոցի երկրներ, մասնավորապես, Իրաք: Ի դեպ, իմ Իրաք այցելության ընթացքում հայկական, իրանական, կատարական ընկերությունները մի փաստաթուղթ ստորագրեցին, ըստ որի, ցանկանում են Պարսից ծոցի հատակով օպտիկամալուխային ենթակառուցվածքներ անցկացնել դեպի Կատար, այսինքն՝ արաբական աշխարհ: Ասեմ, որ Չինաստանի նախարարը տպավորված էր, չգիտեր, որ այդպիսի ենթակառուցվածքներ ունենք»,-ասաց Հակոբ Արշակյանը:

Նախարարի խոսքով, տեղեկացվել է նաև, որ «Հյուսիս-Հարավ»-ի կառուցման ընթացքում նախատեսում են այդ օպտիկամալուխային հզորությունները մեծացնել: Կա ճանապարհի տակով մալուխ անցկացնելու հնարավորություն:

«Այդ ուղղությամբ քննարկումների մեջ ենք: Ինչո՞ւ է սա կարևոր, Հայաստանը չպետք է դիտարկվի որպես կղզյակ, այլ՝ որպես տարածաշրջան, որում մեր երկիրը ինտեգրված լինի հնարավորինս շատ ուղղություններով, ծրագրերով՝ մեծացնելով իր դերը»,-հավելեց նա:

Նյութի աղբյուրը՝ Armenpress