Ազգային Ժողովի արտահերթ ընտրություններին մասնակցող քաղաքական ուժերը ներկայացրեցին բանկային համակարգի բարեփոխումների իրենց ծրագրերը: Առաջին ալիքի ուղիղ եթերում, դեկտեմբերի 9-ին կայանալիք ԱԺ արտահերթ ընտրություններին մասնակցող 11 քաղաքական ուժերի առաջին համարների բանավեճի ընթացքում «Օրինաց երկիր» կուսակցության նախագահ Արթուր Բաղդասարյանը  բոլոր քաղաքական գործիչներից հետաքրքրվեց, թե ինչպիսի քայլեր պետք է ձեռնարկվեն բանկային համակարգը բարեփոխելու ուղղությամբ:

«Ազգային առաջընթաց» կուսակցության ցուցակը գլխավորող Լուսինե Հարոյանը նշեց, որ իրենց թիմը կարևորում է տնտեսությունը վաշխառուական համակարգի ճիրաններից ազատելը:

«Պատահական չէ, որ Հայաստանի նման փոքրիկ երկրում կա 20-ից ավելի բանկ, էլ չեմ ասում՝ ինչքան վարկային կազմակերպություններ, գրավատներ, և դրանք օրեցօր  սնկի պես աճում են: Սա ինչ է նշանակում, որ տնտեսության արյունը՝ ֆինանսը, որը պետք է ծառայեր նաև տնտեսական կարիքներին, իրականում ծառայում է մի քանի անձանց գերշահույթ բերելու գործին: Մինչև մենք այս խնդիրը չլուծենք, ոչ մի առաջընթաց տնտեսությունում չենք ունենալու:

Քանի որ մենք սոցիալական ուղղվածության կուսակցություն ենք, գտնում ենք, որ պետությունը պատասխանատվություն է կրում իր քաղաքացիների սոցիալական ապահովության համար: Պետությունը պետք է օրենսդրական լծակներով ստիպի բանկերին ունենալ վարկային պորտֆելում հատուկ վարկատեսակներ»,-ասաց Հարոյանը:

«Քրիստոնեա-ժողովրդական վերածնունդ» կուսակցության առաջին համար  Լևոն Շիրինյանի կարծիքով՝ բանկերը պետք է խթանեն արտադրության զարգացումը:

«Բանկերը պետք է խթանեն արտադրության զարգացումը: Մեր բանկերը արտադրություն չեն զարգացնում: Նրանց նպատակամղվածությունը բոլորովին այլ է: Բանկերը պետք է նպաստեն արդյունաբերության վերականգնմանը: Հարցրեք ձեռնարկատերերին, տեսեք ինչ վիճակ է. բանկը ոչ միայն զարգացում չի ապահովում,  այլև խանգարում է զարգացմանը»,- ասաց Շիրինյանը:

«Լուսավոր Հայաստան» կուսակցության ցուցակը գլխավորող Էդմոն Մարուքյանը գտնում է, որ Հայաստանում կայուն բանկային համակարգ է:

«Հայաստանում դարձել է շատ հանրահայտ բանկային համակարգին հարվածելը, որովհետև դա ժողովրդի սրտից  է բխում, բայց Հայաստանում կայուն բանկային համակարգ է, և այսօրվա բանկային համակարգի շնորհիվ է, որ դոլար-դրամ  կուրսի տատանում չունենք:  Պետք է ամեն ինչ անենք, որ կայուն երկիր ունենանք, էժան փողերը բերենք Հայաստան, մարդկանց էժան վարկեր տան: Մարդիկ ինչո՞ւ են դժգոհ բանկային համակարգից. վարկը շատ թանկ է, որովհետև  ռիսկերը շատ մեծ են»,- ասաց  Մարուքյանը:

«Իմ քայլը» դաշինքի ցուցակը գլխավորող վարչապետի պաշտոնակատար Նիկոլ Փաշինյանը հիշեցրեց, որ իր կառավարության օրոք  125 հազար մարդ արդեն իսկ  «սև ցուցակներից» դուրս է եկել:

«125 հազար մարդու վարկային պատմությունը մաքրվել է, և սրան ուզում եմ ավելացնեմ նաև այն 150 հազար քաղաքացիներին, ովքեր երթևեկության կանոնների տուգանքների համար 13 միլիարդ դրամի տակ էին, և նրանց հաշիվների մասնակի կալանք էր դրված, և դրա պատճառով ԴԱՀԿ-ի սև ցուցակներում էին, այդ մարդիկ նույնպես սև ցուցակներից դուրս են եկել: Այսօր կա շատ հստակ գործընթաց, որ բանկային համակարգը ֆինանսավորում է հենց արդյունաբերությունը: Այսօր բացված կենցաղային տեխնիկայի գործարանը ստեղծվել է ամբողջությամբ  Հայաստանի բանկային համակարգի վարկերի միջոցով»,- ասաց Փաշինյանը:

ՀՅԴ առաջին համարը՝ Արմեն Ռուստամյանն ընդգծեց՝ բանկերը պարտավոր են սպասարկել քաղաքացիներին պատշաճորեն :

ՀՀԿ-ի ցուցակի առաջին համար Վիգեն Սարգսյանը նշեց, որ վերջին տարիներին  31 անգամ ավելացել են բանկերի ներգրավված ավանդները և 25 անգամ՝ վարկերը:

«Վարկային ռեսուրսները այս տարիների ընթացքում անընդհատ էժանացել են՝ հասնելով 5 տոկոսի՝ ավանդներում, և 10 տոկոսի՝ դոլարային վարկերում: Դա շատ մեծ նվաճում է, իսկ բանկերը լռություն են սիրում: Իհարկե, Վրաստանի օրինակը գայթակղիչ է, բայց պետք է անել այնպես, որ բանկերը չվախենան»,- ասաց Սարգսյանը:

«Մենք» դաշինքի ցուցակը գլխավորող Արամ Սարգսյանը նշեց, որ հարցը Կենտրոնական բանկի և առևտրային բանկերի փոխհարաբերությունների դաշտի տիրույթում է, և դա  քննարկման առակա չի դարձնի:

ԲՀԿ-ի նախագահ Գագիկ Ծառուկյանի խոսքով՝ բանկերի սեփականատերերը պետք է վստահություն ունենան, որ կարողանան էժան գումարներ բերել երկիր և վարկեր տրամադրել գյուղատնտեսության, փոքր և միջին բիզնեսի ու երիտասարդ ընտանիքների համար:

Արթուր Բաղդասարյանն ասաց, որ Հայաստանի բանկային համակարգը կայացած է  և նպաստում է Հայաստանի տնտեսության զարգացմանը, սակայն խոսքն այն մարտահրավերի մասին է, որի առջև հայտնվել է հայ ժողովուրդը:

«1.5 միլիոն մարդ բանկերում, վարկային կազմակերպություններում, գրավատներում գերի է ընկել: Այստեղ անհրաժեշտություն կա համակարգված պետական ծրագրի մշակման  և իրականացման»,- ասաց Բաղդասարյանը: