+374 94 000 446

ԵԱՏՄ երկրները պետք է մրցակցեն ոչ թե միմյանց, այլ գլոբալ արտաքին շուկաների հետ

Դիտվել է` 116

24.10.2018
post single img

Եվրասիական տնտեսական միության երկրները պետք է արդյունավետ կառուցեն հարաբերությունները, որպեսզի մրցակցեն ոչ թե միմյանց, այլ գլոբալ արտաքին շուկաների հետ: Հոկտեմբերի 23-ին այդ մասին հայտարարել է Հայաստանի փոխվարչապետի պաշտոնակատար Մհեր Գրիգորյանը` Եվրասիական գործընկերության 3-րդ միջազգային համաժողովի շրջանակում կազմակերպված «ԵԱՏՄ տնտեսության իրական հատված. ինտեգրման պայմաններում ներուժի զարգացում» քննարկման ընթացքում:

Մհեր Գրիգորյանը խոսել է Իրանի և Եվրասիական տնտեսական միության միջև ստորագրված ժամանակավոր ազատ առևտրի համաձայնագրի ներքո ստեղծված հնարավորությունների մասին, անդրադարձել հայ-իրանական հարաբերություններին, ինչպես նաև Հայաստանի՝ այլ երկրների հետ արտոնյալ ռեժիմներով պայմանավորված առևտրատնտեսական հարաբերություններին:   

Նրա ասելով, եթե միության ներսում համագործակցությունը հիմնված լինի միայն բացառման սկզբունքի վրա, ապա բիզնեսը կկորցնի իր մոտիվացումը և ավելի քիչ տրամադրված կլինի ներքին զարգացմանը: «Որքան շատ արգելքներ վերացնենք, այնքան ավելի մեծ կլինի տեխնոլոգիական բեկումը՚, - նշել է Մհեր Գրիգորյանը` այդ համատեդքստում ընդգծելով ԵԱՏՄ երկրների օրենսդրությունների ներդաշնակեցման անհրաժեշտությունը: Նա նաև կարևորել է բիզնեսի աշխուժացման համար ջանքերի համախմբումը: Փոխվարչապետի պաշտոնակատարի համոզմամբ, միությունում պետք է լինի բորսա, որտեղ դրվեն նոր տեխնոլոգիական և թվանշանային լուծումներ: Տրանսպորտային շրջափակման, թանկարժեք լոգիստիկայի և էներգառեսուրսների պայմաններում Հայաստանը շեշտադրումները կատարում է մտավոր բաղադրիչի վրա: Խոսքը վերաբերում է, մասնավորապես, տեղեկատվական տեխնոլոգիաների հատվածին, որը հանրապետությունում լավ զարգացած է: Սակայն Հայաստանի այդ ոլորտի  ձեռքբերումները բավականաչափ չեն ներկայացվում ԵԱՏՄ տարածքում:

«Եվրասիական շաբաթ 2018՚-ի ուշադրության կենտրոնում Միության երկրների տարածքում բարենպաստ բիզնես-միջավայրի ստեղծումն է, արտադրական կապերի ամրապնդումը, արտահանման ներուժի զարգացումը եւ օտարերկրյա ներդրողների համար գրավիչ պայմանների ստեղծումը: Միջոցառման գործընկերների թվում են Ռուսաստանի Դաշնության արդյունաբերության եւ առեւտրի նախարարությունը, «Ռոստեխ՚ը, Հեռանկարային տեխնոլոգիաների զարգացման կենտրոնը (ՀԶՆ), Եվրասիական համագործակցության ֆորումը եւ այլն: Համաժողովին մասնակցում են 2500 մասնակիցներ 25 երկրներից: ԵԱՏՄ արդյունաբերական եւ համագործակցության ներուժը ներկայացնում են ավելի քան 120 ընկերություններ վեց հիմնական ճյուղերից. դեղագործություն եւ բժշկական սարքավորումներ, գյուղատնտեսություն, ոսկերչական ճյուղ, թեթեւ արդյունաբերություն, նորարարական շինանյութերի արտադրություն եւ արդյունաբերություն (ներառյալ ՏՏ): «Եվրասիական շաբաթի՚ շրջանակում նախատեսվում է անցկացնել 35 միջոցառում:

 

Նյութի աղբյուրը՝ ArmInfo

Ծառայություններ

Վերջին դիտումները