Արգենտինան պատրաստակամ է աշխատել Հայաստանի կառավարության հետ երկկողմ առևտրաշրջանառությունը մեծացնելու համար: Հրավիրված մամուլի ասուլիսում այս մասին նշեց Հայաստանում Արգենտինայի արտակարգ և լիազոր դեսպան Գոնզալո Ուրրիոլաբեիտիան:

«Եթե նայում ենք առևտրաշրջանառության վիճակագրությունը, ապա տեսնում ենք, որ 1998 թվականից սկսած գրեթե զրոյական արդյունքից հասել ենք 8 մլն դոլարի: Արգենտինան կարևորում է այս ուղղությամբ համագործակցությունը: Իհարկե, կան որոշ դժվարություններ, ինչպես գիտեք, տարածքային առումով երկու երկրները միմյանցից հեռու են գտնվում, Հայաստանը չունի ելք դեպի ծով, սակայն աշխատելու ցանկությունը մեծ է, և մենք ուղիներ ենք փնտրում առաջ շարժվելու համար: Արգենտինական կողմը հիմնականում աշխատում է դեպի Հայաստան գյուղատնտեսական ավտոմեքենաների, աուդիովիզուալ սարքավորումների արտահանման ուղղությամբ:

Դեսպանը նշեց, որ արգենտինական շուկային էլ կարող են հետաքրքրել հայկական գինիները և տեղեկատվական տեխնոլոգիաների ոլորտում եղած առաջարկները:

«Տեղեկատվական տեխնոլոգիաների ոլորտի ծառայությունները Արգենտինային հետաքրքրում են: Ինչպես գիտեք, մեր երկիրն արդյունաբերական է, հետևաբար, նոր լուծումների անհրաժեշտություն կա»,-ասաց դեսպանը:

 Ինչ վերաբերում է առաջիկա ներդրումային ծրագրերին, ապա Գոնզալո Ուրրիոլաբեիտիան նշեց, որ ակտիվ աշխատում են գյուղատնտեսության ոլորտում: Համատեղ ծրագրի համար Շիրակի մարզում տրամադրվել է հողատարածք, որտեղ մշակաբույսերը կաճեցվեն և՛ հայկական մեթոդով, և՛ արգենտինական տեխնոլոգիայով: Այսինքն՝ հողատարածքի մի հատվածում մշակաբույսերը կաճեցվեն հայկական մեթոդով, մի հատվածում՝ արգենտինական տեխնոլոգիայով:

«Կկիրառվեն արգենտինական տեխնոլոգիաները, որոնք հնարավորինս քիչ ծախս են պահանջում: Ժամանակի ընթացքում կերևա, թե որքանով է արգենտինական տեխնոլոգիան արդյունավետ աշխատում: Եթե արդյունավետ լինի, ապա հայ ֆերմերները հետագայում դա կարող են կիրառել»,-հավելեց դեսպանը: Նա տեղեկացրեց, որ ծրագիրն արդեն ընթացքի մեջ է: