+374 94 000 446

Արդեն 2019 թ. անհրաժեշտ է ունենալ ապահովագրության համակարգ, գործուն հակակարկտային կայաններ և հակակարկտային ցանցեր

Դիտվել է` 1224

13.08.2018
post single img

Կառավարությունը չպետք է միայնակ թողնի գյուղացիներին այս աղետի հետևանքների մեղմման գործում, Facebook-ի իր էջում այդպիսի կարծիք է հայտնել ՀՀ առաջին փոխվարչապետ Արարատ Միրզոյանը` Արմավիրի մարզի Բամբակաշատ, Մրգաշատ, Ալաշկերտ և այլ համայնքներ այցելությունից հետո, որտեղ երկու օր առաջ կարկուտն ու փոթորիկը մեծ վնասներ էին հասցրել բերքին և ենթակառուցվածքներին։

«Վստահ ենք, որ կառավարությունը չպետք է միայնակ թողնի գյուղացիներին այս աղետի հետևանքների մեղմման գործում։ Վաղվանից կսկսվեն վնասի գնահատման աշխատանքները, որից հետո կառավարությունը կքննարկի գյուղացիական տնտեսություններին հնարավոր աջակցության չափը։

Միաժամանակ անհրաժեշտ են համակարգային լուծումներ, և մենք հետևողականորեն աշխատելու ենք, որ արդեն հաջորդ տարի ունենանք գյուղացիական տնտեսությունների ապահովագրության համակարգ, գործուն հակակարկտային կայաններ, տարածում գտնեն հակակարկտային ցանցերը՚,- գրել է նա: Ավելի վաղ գյուղատնտեսության նախկին փոխնախարար Արմեն Հարությունյանը, հայտարարել էր, որ Հայաստանում գյուղատնտեսական ռիսկերի ապահովագրության ծրագիրը կարող է սկսվել 2018 թվականից կամ 2019 թվականի սկզբից:

Գյուղատնտեսության նախարարության տվյալներով`գերմանիայի KFW բանկը 5,3 մլն եվրո կտրամադրի գյուղատնտեսության ապահովագրության ներդրման փորձնական ծրագրի իրականացմանը: Դրանցից միայն 4.8 մլն եվրոն է օգտագործվելու միայն ապահովագրության սուբսիդավորման համար: Մնացած 515 հազար եվրոն կուղղվի խորհրդատվական ծախսերին: Հայաստանի կառավարությունը, որը ներկայացված է Գյուղատնտեսության նախարարության միջոցով, համաֆինանսավորման նպատակով կծախսի 5 մլն եվրո: Բացի այդ, Կլիմայի ներդրումային հիմնադրամի կողմից տրամադրվել է 2 մլն եվրո, որից 200,000-ը կտրամադրվի սուբիսդավորման վճարներին, 1,8 մլն-ը` խորհրդատուի վարձրատրությանը: Խորհրդատվությունով կզբաղվի կոնսորցիումը, որը բաղկացած է երեք ընկերություններից:

Այդ ընկերությունների հետ միասին ՀՀ գյուղատնտեսության նախարարությունը և Կենտրոնական բանկը պատրաստում են առաջին փորձնական նախագիծը, որի շրջանակներում նախատեսվում է ստեղծել Գյուղատնտեսական ռիսկերի կառավարման ազգային բյուրո: Բյուրոն կդառնա մի գործիք, որով կգնահատվեն բնական էկոլոգիական աղետների հետևանքները: Կստեղծվի վնասների գնահատման ինստիտուտ, ընտրվելու են հիմնական ապահովագրական ռիսկերը: Բյուրոն կզբաղվի նաև ապահովագրական պրոդուկտների մշակումով: Հարությունյանը նշել է, որ ապահովագրությունը սկզբնական շրջանում կտարածվի մրգերի, և ապա բանջարեղենի և հացահատիկային ապրանքների վրա:

Ինչպես հուլիսի 17-ին նշել է ՀՀ գյուղատնտեսության նախարար Արթուր Խաչատրյանը, 2019 թ. սկզբին նախատեսվում է մեկնարկել գյուղապահովագրության պիլոտային ծրագիր Արմավիրի, Արարատի և Շիրակի մարզերում:

Ծառայություններ

Վերջին դիտումները